FAASALALAUGA FAAPITOA FAALAUA’ITELE MAI LE OFISA O LE LOIA SILI A LE MALO O SAMOA; TUTOATASI O LE OFISA O LE LOIA SILI I MATAUPU TAU SOLITULAFONO – LAAULIOLEMALIETOA LEAUATEA SCHMIDT & ISI
(19 Iuni 2020); I le ava e tatau ai, ua faia ai lenei faasalauga e tali atu ai i faamatalaga ma saunoaga na faia e le Afioga ia Laauliolemalietoa Leauatea Schmidt (‘Laauli’) i luga o le Polokalame o le Manuo a le TV3 (“Manuo”) na faasalalauina i le Aso Tofi 11 Iuni 2020.
O faamatalaga ma saunoga na faia e Laauli e aafia ai se mataupu tau soligatulafono o loo molia ai o ia i le Faamasinoga.
O faamatalaga ma saunoaga a le Afioga ia Laauli e aafia ai ni mataupu taua e faatatau i galuega tauave ma malosiaga faaletulafono a le Loia Sili o loo aiaia i lalo ole Faavae o Samoa ma le Tulafono a le Ofisa o le Loia Sili 2013.
E ao ona faia se tali aloaia a le Ofisa o le Loia Sili e faamanino ai nei vaega ina ia aua nei taitaiseseina pe aveseseina ai nei faamatalaga e nisi. O galuega tauave ma malosiaga faaletulafono a le Loia Sili o loo aafia mai i faamatalaga a Laauli e aofia ai:
(i) malosiaga a le Loia Sili na te faia, faatonutonuina po o le faamutaina o so o se taualumaga mo sē tuuaia i se soligatulafono ua faia po o so o se mataupu e faasino i se soligatulafono; ma le
(ii) tūtoatasi o le Loia Sili.
O le faamatalaga a le Afioga ia Laauli i luga o le Manuo, o le faamasinoga lea e faia nei (criminal proceeding) sa ia faapea mai “ua toe ō Peseta ma le Palemia momoli” ia “i lima o le Attorney General, momoli” ia “i lima o leoleo, e toe amata uma le case, ma o le case la lea e faia nei, e le’o se case a” ia “ma Peseta, ae o le case a” ia “ma le Malo o Samoa.”
O nei faamatalaga ua taua i luga e lē sa’o ma e lē o se faatinoga lea o taualumaga pea faia ni suesuega mo ni moliaga i ni mataupu tau soligatulafono (criminal proceedings):
(i.) O mataupu tau tulafono i le vā o le Aifioga ia Laauli ma isi tagata (civil proceedings) (e le’i aafia ai le Malo), ua maea ona faia iai le faaiuga a le Faamasinoga. Ma o taualumaga uma o civil proceedings e ese lona ia faagasologa ma e lē feāiāa’i ma mataupu tau moliaga tau soligatulafono (criminal proceedings).
E leai la se aafiaga o le mataupu tau civil proceedings a le Afioga ia Laauli, i le isi mataupu tau soligatulafono (criminal proceedings) lea ua tagofia e le Faamasinoga.
(ii.) So’o se mata’upu lava e faatatau i moliaga tau soligatulafono, e nā o le Loia Sili lava, e iai lona malosiaga e nā te toe faaui i tua se mataupu tau soligatulafono e pei ona aiaia i lalo o le Tulafono Fa’avae 1960, ma le Tulafono a le Ofisa o le Loia Sili 2013.
(iii.) Na taua e Laauli le saunoaga a le Palemia e faapea “it’s no longer your case, o le case a le malo”
O lenei faaupuga e ō gatasi ma le tulaga e masani ona tupu i mataupu tau soligatulafono. A faia e se tagata se soligatulafono, o lena soligatulafono e avea ma soligatulafono ma o se mataupu i le vā o le tagata ma le Malo (State).
A uma ona faia ni moliaga tau soligatulafono i se tagata, ona tuuina mai lea o nei mataupu i le Ofisa o le Loia Sili e faatulagaina ma faatino taualumaga mo mataupu tau soligatulafono.
O le faia o se faaiuga e faatino ni moliaga pe leai, e lima taitaiina i faiga faavae e faatino ai Moliaga (Prosecutorial Guideline) ma o nei fa’avae e utagia ile tele o atunuu, lea o lo o faataoto mai ai alafua e iloiloina ai pe tatau ona molia le tagata pe leai.
O lenei taiala e manaomia ai le saolotoga ma faaiuga tūto’atasi o le Loia Sili mai faiga faaupufai, so o se auala o faasalalauga ma tusitala, tagata lautele, uunaiga mai se vaega po o tagata taitoatasi e faamalosia ni auala lē talafeagai e faia ai se faaiuga, aemaise ai le saolotoga mai faatonuga po o se pule e faia ai se faaiuga e se isi lava tagata po o se pulega foi.
I le fuafuaina pe tatau ona faagasolo se matapu mo moliaga, o fesili nei e tolu (3) e vaavaai iai:
(i) prima facie case;
(ii) what is the reasonable prospects of the case; and
(iii) whether there was public interest in proceeding with the case.
E ui na iai le naunautaiga o lē na tagi e ave i tua lana tagi, na faia le faaiuga e faagasolo pea le mataupu tau soligatulafono i le maea ai o le iloiloga a le Loia Sili e tusa ai ma faiga faavae ma alafua ua taua i luga, e aunoa ma se faalavelave o se isi.
I lona tulaga aoaotetele, o le malosiaga e faia ai, faatonutonu pe faamutaina so o se taualumaga tau soligatulafono i luma o le fa’amasinoga, ua nā o le Loia Sili ma loia o lana Ofisa e mafai ona faia lea tulaga. Ma o loo aiaia i le Mataupu 41 o le Tulafono Faavae 1960 ma le fuaiaupu 5(2)(b) ma le 7(1)&(2) o le Tulafono a le Ofisa o le Loia Sili 2013.
I le faatinoina o le malosiaga tau soligatulafono (criminal proceedings) i lalo o Tulafono ua taua i luga, e tutoatasi le Loia Sili ma e lē noatia i se faatonuga mai so o se isi lava tagata seia vagana se faatonuga a le Faamasinoga.
