OFISA O LE SO’OUPU; Ua fa’amalamalama manino e le Matagaluega o le Soifua Maloloina le mataupu ua fa’asalalau fa’alaua’itele i luga o Upega o Fa’amatalaga (Social Media), e tusa ai ma le maliu o se taule’ale’a i le Aso To’ona’i 15 o Aukuso 2020 i le Maota Gasegase Fa’aitumalo i Leulumoega.
O nei fa’amatalaga ua fa’asalalau ma tu’uaia ai le maliu o lenei taule’ale’a e mafua mai ona ua a’afia i le vairasi o le Koviti – 19, peita’i ua fa’amanino e le Matagaluega o le Soifua Maloloina e leai ni faamaumauga faafomai e faamaonia ai lea manatu ma o le a tālia le i’uga o su’esu’ega a le Foma’i Fa’apitoa, (Coroner) e faamaonia aloaia ai le mafua’aga tonu o le maliu o lenei ali’i.
O lenei taule’ale’a na matapogia i lona fale ma fa’anatinati atu ai i le Falema’i peita’i e taunu’u atu i le Falema’i i Leulumoega ua maliu.
I lipoti a le Falema’i, o lo’o fa’amauina ai e leai se gasegase tumau o lenei taule’ale’a, ma e leai fo’i se ma’i tugā na a’afia ai o ia.
I molimau a sui ole aiga oloo faamaonia ai foi le atoa le malosi o ia, talu mai ona toe taliu atu i lona aiga I le maea ai o le 14 Aso sa nofo va’ava’aia (Quarantine) ai ina ua taunuu mai I atunuu I fafo e pei o tutuuga ole Poloaiga o Faalavelaave Faafuasei , ma e leai fo’i se fa’ailoga e iloa ai o lo’o ma’i, sa fa’atino fo’i ana galuega masani e pei o le aga’i i le Fa’ato’aga i le vaiaso ua mavae.
Na mae’a lelei le 14 Aso na nofo va’ava’aia ai o ia ina ua taunu’u mai Samoa seia aulia le Aso 31 o Iulai 2020, ma mautinoa ai e leai ni āuga (tested negative) o le Koviti – 19 o a’afia ai, a’o le’i fa’amatu’u atu e malaga i lona aiga.
Mo le silafia e le atunuu, o lo’o ta’oto le Ta’iala e tali atu ai i le Koviti – 19 (COVID – 19 Response Plan) o lo’o mulimulitu’i ai galuega a le Matagaluega o le Soifua Maloloina, ma fa’amalosia ai puipuiga e ala i le nofo va’ava’aia mo le 14 Aso o tagatanu’u Samoa e toe taliu mai i le atunuu, ma ia mautinoa e lē a’afia i āuga o lenei fa’ama’i.
I aiaiga mo i latou e toe fo’i mai Samoa, e matuā fa’amalosia le faia o suesuega (COVID tests) muamua ia mautinoa e le’o maua i Koviti 19, (tested negative) e ala i se siaki fa’apitoa e maua lona tali (result) i le tolu aso a’o lumana’i ai le aso e malaga mai ai i Samoa.
I le taimi nei oloo mataituina pea e le Matagaluega lenei mataupu ma o le a logoina le atunuu I nisi o suiga e ona tulai mai I le maea ai ole taotoga faapitoa e faia ele Fomai, (Coronavirus).
