(OFISA O LE SO’OUPU: I lana Fonotaga FK(20)Faapitoa 34 o le Aso Lua 4 Aokuso 2020, na talanoaina ai e le Kapeneta le Pepa PK(20)695 ma faamaonia ai Teuteuga o Poloaiga mo Faalavelave Tutupu Faafuasei mo le KOVITI1e pei ona auiliili atu i lalo:
1. Talosaga a le Huanan Fishery
a) Le malaga mai o le Ea Niu Sila e auina atu ai tagatanuu o Saina e to’a valusefulu (80), o loo galulue faavaitaimi i Samoa nei i Faiga Faiva ma Atina’e a le Malo, ona ua mae’a a latou konekarate ma taimi faatulagaina e nonofo ai i Samoa. E aofia i lenei faigamalaga i latou o loo galulue i vaa i’a.
e) O lenei faigamalaga ua fuafuaina i le Aso 17 Aokuso 2020.
i) Le mafai ona taula i le Uafu i Matautu o le Vaa fagota a le Huanan Fishery e tapena ai i latou o loo fuafua e malaga atu i lenei faigamalaga. E totogiina uma e le Huanan Fishery vaega moomia ao nonofo ai i latou nei i faletalimalo mo le tālia o lenei faigamalaga.
o) Le faataga ona auina mai i le laueleele o le tasi o le auvaa o loo aafia i manuaga mo togafitiga faafoma’i;
2. Vaa Fagota e Mafai ona Taula i le Uafu i Matautu
a) Le mafai ona taula i le uafu i Matautu e lē sili atu i le 4 vaa fagota i totonu o le 48 itula.
3. Malaga a le Air Ambulance
a) Le mafai ona malaga mai le Air Ambulance i soo se taimi mo le auina atu o gasegase mo togafitiga i atunuu i fafo;
e) Le tausisia pea o aiaiga mo siaki faafomai mo le auvaa pe a taunuu mai, aua puipuiga o le COVID19.
4. Faigamalaga a le Fiji Airways
a) Le faatinoina o le faigamalaga a le Fiji Airways e auina mai ai nisi o tatou tagatanuu, tamaiti aoga, foma’i a Amerika Samoa faapea tagata faigaluega a nisi o Kamupani o loo i Fiti.
e) Le mafai ona malaga sa’o loa tagatanuu o Amerika Samoa i Amerika Samoa pe a taunuu mai i Faleolo e aunoa ma le faanofoesea.
5. Talosaga a Tokelau
a) Le malaga mai o tagatanuu o Tokelau e aofia ai tamaiti aoga mai Niu Sila mo le toe foi atu i Tokelau;
e) O i latou nei o le a faanofoesea i Samoa nei mo le 14 aso, ae faatupeina uma e le Malo o Tokelau;
i) E faatoa amatalia nei faigamalaga pe a latalata ina tatala le tuaoi o Toelau ia Oketopa.
6. Faigamalaga mo le Toe Faafoiina mai o Tagatanuu o Samoa
a) Le faatinoina o faigamalaga mo le toe faafoiina mai o tagatanuu o Samoa mai Niu Sila i le tai tolu vaiaso;
e) Le faaauau pea o malaga i vaiaso taitasi mo le auina mai o uta mo oloa seia aulia le masina o Oketopa 2020.
Le amata faamamaluina o nei suiga i le Aso Lulu 5 Aokuso 2020 seia toe iai se isi faaaliga.
E faatumauina pea o isi aiaiga o Poloaiga o Faalavelave Tutupu Faafuase’i na mua’i tuuina atu.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
