TA’IMUA OE I FA’ATA’ITA’IGA LELEI I ISI TAGATA FAIGALUEGA
Tusia: Taunuuga Toatasi
O le fa’amanatuina o le Aso mo Tagata Faigaluega uma a le Malo, o se laolao lea sa toe fa’amanatu ma lu’itauina ai le soifua auauna a le aufaigaluega a le Matagaluega o le Palemia ma le Kapeneta e ala i lana tautua o lo o fa’atino e le gata mo le Malo, ae fa’apea fo’i i le atunu’u atoa.
O le aso fa’amanatu lea sa avea foi ma aso e tatala aloaia ai le vaega fa’apitoa mo fa’amatalaga (information centre) a le Matagaluega.
O le masina lenei o Oketopa i tausaga ta’itasi, e fa’amanatu ai lava lea aso fa’apitoa, ma o se aso fo’i e tu’uina atu ai le avanoa mo le mamalu i le atunu’u, e aga’i mai ai, e silasila i auaunaga o lo o fa’apea ona ofoina atu e lea Matagaluega ma lea Matagaluega, ae fa’apea foi i fa’alapotoptoga tumaoti a le Malo.
I le saunoaga a le Ofisa Sili o Pulega a le Matagaluega o le Palemia ma Kapeneta, Agafili Shem Leo, sa ia toe fa’amanatu ai i le aufaigaluega le taua o lea aso e fa’asino i tagata faigaluega o lo o tautuaina le Malo ma le atunu’u.
“O le tatou tiute, o le tulei i luga o le isi ou uso po’o le tuafafine faigaluega.
“O le aso e fa’amanatu ai ia i tatou tatou le taua o le galulue fa’atasi, tatou te tulei ai i luga le aufaigaluega.
“E lē o se aso tatou te fa’amanatu ai po’o ai ua sili, po’o ai ua tele ana mea ua fai mo le atunu’u, ae le o se aso foi e fa’amanatu ai po’o ai ua telē lona sao i totonu o le Matagaluega.”
Na saunoa Agafili e fa’apea, o le aso lenei tatou te manatu ai le tatou matafaioi, o le tautua lea mo le atunu’u.
Tatou te tautua le atunu’u i le laufofoga fiafia, loto maualalo ma le fa’amaoni, o le fa’aopoopo lea a Agafili.
“A’o le feau taua o le aso lenei, avea oe o se tagata faigaluega e te tuleia le isi uso po’o le isi tuafafine i luga.”
“Avea oe o se tagata e mafai ona fa’alagolago atu i ai le isi uso po’o le isi tuafafine faigaluega, e amo fa’atasi ai le lua avega.
“Avea a’u ma se tagata e lagonaina le taua o le tautua o lo o fa’atino e le isi uso ma le isi tuafafine, ina ia i ai le mea e ta’u o le connective appreciation.”
Na fa’aopoopo foi Agafili e fa’apea, e tele lavelave ma fitā ma to’atugā o galuega fa’apenei, e le gata o totonu lava o le tatou lotoifale, ae fa’apena foi i le tilotilo mai a Samoa.
O le fesili tele e fa’alogo i ai. O a tatou mea o fai? A o fea tatou te omai ai? A o fea tatou te o i ai?
O lau tali, o tatou o tagata faigaluega, tatou te galulue ma le loto maualalo ina ia fai le tautua mo le atunu’u.
O fautuaga ma timaiga e pei ona saunoa i ai le Ofisa Sili o Pulega, o naunautaiga ina ia fa’atinoga le auaunaga ma le fa’amaoni, a ia fa’atino foi le auaunaga i le agaga o le galulue fa’atasi, aua o le tele o sulu e mama ai se avega.
Na fa’atautaia ai foi ma nisi o polokalame fa’atauvaga e pei ona vaevaeina ai le Matagaluega i ona vaega e fa (4).
O ia polokalame fa’agasolo o finauga (debate) i le va o au sa filifiliae tusa o mataupu sa tu’uina atu i vaega taitasi e aga aga’i iai manatu.
E le gata i lea, a o le tauvaga lauga a au taitasi mo le fa’atauaina lava o le aso mo tagata faigaluega a le Malo.
