(Aso Lulu, 12 Oketopa 2022): O le Aso Tofi, 13 Oketopa ma le Aso Faraile, 14 Oketopa 2022, o le a usuia ai le Fonotaga Lona #2 a le Atoa o Samoa mo lenei tausaga i le Faletalimālō a le Taumeasina.
O lea fonotaga o le a tuliloa ai matā’upu sa talanoaina i le fonotaga ua mavae i Pagopago, lea sa talimālō ai le Mālō o Amerika Samoa iā Iulai o le tausaga nei ma soālaupule ai matā’upu tāua e tatau ona ‘ave i ai le fa’amuamua mo le manuia o Mālō e lua.
O Ta’ita’i, Fa’auluuluga ma nisi o le aufaigaluega o Mālō e lua, o le a feiloa’i i lea fonotaga. O le itu tāua o lea feiloā’iga, e silasila toto’a ai i avanoa talafeagai e tatau ona taula’i i ai le va’ai mo auaunaga ‘ese’ese e atia’e ai le so’otaga vāvālalata o Samoa e lua, fa’apitoa i matā’upu e feso’ota’i ma le Soifua Mālōlōina, Turisi, Tamāo’āiga, A’oa’oga, Feso’otā’iga Fa’aneionapo, Femalagā’iga, Fa’ato’aga ma isi.
Mo le silafia e le atunu’u, o le asō (Aso Lulu, 12 Oketopa 2022) na āsia ai e sui o le aumalaga mai Amerika Samoa nisi o auaunaga a Matāgaluega ma Fa’alapotopotoga Tumā’oti a le Mālō mo le tuliloaina o matā’upu sa soālaupule i le fonotaga iā Iulai i Pagopago. O le finagalo mauāluga o Ta’ita’i o Mālō e lua, ia silasila toto’a le aufaigaluega o Mālō e lua, i matā’upu sa talanoaina ma āsia ina ia maua se tali lelei a’o i ai i laufanua o Samoa.
O le ulua’i aso o lea fonotaga, o le a tomua i le talanoaina o le minute o le fonotaga talu ai, ona soso’o ai lea ma folasaga o le aotelega ua o’o i ai galuega ua faia ma o lo’o tuliloaina pea lona taunu’uga. O le aso fa’ai’u, o le a soālaupule ai matā’upu i le va o Matāgaluega ma Auaunaga a Mālō e lua, auā isi la’asaga o lumana’i mo galuega tuliloa o lo’o mo’omia ona fa’atino mai lea taimi i lea taimi ma le talitonuga ia mafai ona maua se tali mautū, o se ai lea mo lea feiloā’iga tāua.
E tauāluga lea fonotaga, i le fa’aafe a le Mālō Samoa, o se avanoa lelei lea mo Pisinisi Tumā’oti e fa’asoa ai ma le aumalaga mai Amerika Samoa i ni matā’upu patino i atina’e fa’aauau mo le manuia o Samoa e lua.
