FA’AIU LE TASUAGA FAIGALUEGA A LE UTOS I LE FA’ALAUILOAINA O NI AUAUNAGA FOU MO SUI FAIIUNITE
A’o alo atu le tatou atunuu i lenei vaitau fiafia o le tausaga, e fa’alauiloa atu ma le agaga fiafia e le Fa’aputugātupe Teufa’afaigaluega o Mavaega Tausi o Samoa, nisi o auaunaga fou ua maea tapenaina mo ona sui fai-iunite;
(i) I se faigapa’aga ma le kamupani o le Pacific 40, ua mafai nei e so’o se sui fai-iunite ona fa’atau iunite e ala lea i le auaunaga o le Talofa Voucher. O le auaunaga a le Talofa Voucher sa amata mai i le tausaga e 2018 ina ia fesoasoani i tagata nu’u o le Pasefika o lo’o aumau i atunuu ese, e ala i le fa’atauina lea o oloa o lo’o maua i pisinisi ese’ese a atunuu o le Pasefika. O lea faiga ua fa’afaigofie ai i aiga ona maua a latou oloa, e aunoa ma se toe fa’atali i se laina o faletupe e tala ai tua seleni.
E silia ma le 150 pisinisi ese’ese i Samoa o lo’o fa’aaogaina lenei auaunaga ma fai pa’aga ai ma le Pacific 40 – Talofa Voucher, ma e fiafia tele le UTOS e fa’alauiloa lea faigāpa’aga fou ua ausia nei, aua le fa’atauina o iunite mai so’o se tulimanu o le lalolagi, i soo se taimi.
(ii) I le vaega muamua o lenei auaunaga toe fa’aleleia, o lea ua toe fa’atulaga foliga va’aia o le tatou Upega Tafāilagi ma fa’aopo’opo iai isi auaunaga lautele;
• Ua mafai nei ona fa’atau sao iunite mai so’o se tulimanu o le lalolagi, e ala i le KlickEx, ANZ online banking Biller ma le Talofa Voucher.
• Ua maea ona teuteu ma toe fa’aleleia atili metotia fa’atekenolosi o lo’o puipuia ai fa’amatalaga ma ala feso’otai a le Ofisa ma sui fai-iunite, aemaise le saogalemu o auala e fa’atau ai iunite i luga o le upega tafāilagi.
• Ua iai suiga i le fa’alauiloaina o auaunaga ese’ese a le UTOS, aemaise le fa’amalamalaina o fa’amanuiaga e ono maua ma lamatiaga o lo’o iai i teugātupe teufa’afaigaluega mo sui fai-iunite.
O le vaega e lua o nei auaunaga toe fa’aleleia, o le ā mafai ai ona fa’atumu Pepa o Talosaga e avea ai ma sui fai-iunite, tu’usao mai luga o le upega tafāilagi, ma o lenei auaunaga o le a mafai ona fa’atino, ae lei maea le masina o Ianuari 2023.
E fautuaina le mamalu o latou o lo’o fia malamalama atili i ia auaunaga fou, e asiasi ifo i le upega tafāilagi a le UTOS – www.utos.ws / ma le upega tafāilagi a le Talofa Voucher – www.pacific40.com mo nisi fa’amatalaga.
(iii) E fiafia foi e fa’alauiloa atu, le tatalaina aloai’a o le tusi taiala fou mo sui fai-iunite, o le “Fa’amatalaga Tau Alamanuia 2022 – 2025”, ma ua fa’amamaluina nei ona amata so’o se teugātupe teufa’afaigaluega a se tagāta-nu’u Samoa i le 25 iunite (fa’aiti’itia mai le 50 iunite sa iai muamua). O lenei suiga ua fa’atinoina, ia fa’amautinoa ai, o lo’o taugofie ma gafatia pea e ō tatou tagata ona fai se teugātupe i le UTOS.
O le Faaputugātupe Teufa’afaigaluega o Mavaega Tausi o Samoa, o se faaputugātupe tūmaoti e pulea e le aufaiiunite ma ua tu’uina atu le fa’atuatuaga i le Kamupani tau Mavaega Tausi, e va’aia ma tausia uma latou meatōtino. O nei meatōtino, ae aofia ai ma vaegātupe o lo’o teufa’afaigaluega i vaega ese’ese o le tamāoaiga e maua mai ai ni seleni fa’aaopopo, e pei o tupe teu fa’avaitaimi i faletupe, nonōgatupe malupuipuia i le Mālō o Samoa ma sea i totonu o kamupani tumaoti i Samoa nei ma le Pasefika. O le anava fa’aagafeso’otai a le fa’aputugātupe, o le manuia lea o tagata uma, ia saunia ni auala faigofie ma taugofie e teufa’afaigaluega ai seleni a so’o se tagātanu’u o Samoa. Ae o lana anava fa’apisinisi, ia ausia ni tupe fa’asili mo aufaiiunite mai ana teugātupe ua māea ona iloilo toto’a.
Mo nisi fa’amatalaga e uiga i lau teugātupe teufa’afaigaluegai le UTOS, fa’amolemole fa’afeso’otai mai le tatou ofisa i le +685 29916 poo o le +685 29649. E mafai foi ona e imeli mai ile info@utos.ws po’o le feso’otai mai foi i luga o le tatou Facebook Page – Unit Trust of Samoa.
