Lau Afioga i le Fofoga Fetalai,
Afifio Minisita o le Kapeneta,
Lau Afioga i le Taitai o le Itu Agai,
Sui Mamalu o le Fono Faitulafono,
Le Tapuaiga mau i lana Afioga i le Ao Mamalu,
Faapea Sui o le Fono o Sui Tofia,
Le Afio o le Fa’amasino Sili, le Peresitene o le Fa’amasinoga o Fanua ma Suafa faapea Alii ma Tama’ita’i o le Faamasinoga,
Ua tatou faatasi foi ma Fa’aululuga o Matagaluega ma Fa’alapotopotoga Tu Maoti a le Malo,
E faapai foi ma le faaaloalo i le faafofoga tapuai mai a le atunu’u i le Paia o Tama ma Aiga,
o Aiga foi ma latou Tama,
Le mamalu o le usoga a Tumua ma Pule, Ituau ma Alataua, Aiga i le tai ma le Va’a o Fonoti,
Le Tapuaiga i Ekalesia i so’o se fata faitaulaga.
Fa’afetai i le alofa o le Atua ua tatou taunuu mai i lenei aso na atofa e toe usuia ai ma faaauau galuega a le Palemene o Samoa.
Lau Afioga i le Fofoga Fetalai, o le autu o lenei folasaga fa’a-Minisita o le fofola lea o se fa’amoemoe o le Malo i galuega tuua a le Palemene ma nisi o tulafono o lo’o fuafua mai, aemaise le Tala Faatatau o le Tupe 2025/2026 lea ua taatia i le tatou Pepa o Galuega.
Na fa’amaea le tatou Fonotaga talu ai nei ia Mati sa tatou pasia ai tulafono toe teuteu o le Faavae ma le Fa’amasinoga o Fanua ma Suafa. O lo’o iai pea i le tatou laulau a fono, tulafono toe teuteu, o le Faavae e faasino i le 10% o Sui Faipule Tama’ita’i ma isi teuteuga o le tulafono mo faiga palota, faapea foi le Tulafono o le Tuu Eseese o le Matagaluega o Leoleo ma Falepuipui.
O le tatou tulafono toe teuteu o le Faavae, na tatou pasia na tuuina atu e le Itu Agai i le Fa’amasinoga i se mau sa lē tatau ona palota le Fofoga Fetalai, i le tulafono o le suiga o le Faavae lea e moomia ai le 2/3 o sui uma o le Palemene. Na teena e le Faamasinoga le mau a le Itu Agai ma faaauau le faamamaluina o suiga o le Faavae (i mataupu tau i le Faamasinoga) i le aso 7 o Aperila i le tausaga lenei. Ua toe faaulu le toe talosaga (appeal) a le Itu Agai mo le mataupu lea ma ua iai nei i luma o le Fa’aamasinoga.
Lau Afioga i le Fofoga Fetalai, e sa’o pe a ou faapea atu, e le’i taoto i se taotoga lelei le fa’aiuga o le tatou Fonotaga talu ai. Ua faamauina i le tala faalosopito o le Palemene o Samoa se tulaga uiga ese, o le lua o ni lafo o le lē faatuatuaina na faatulai e agai i le Palemia ma le Kapeneta. I le lua o vaiaso o le tatou fono talu ai ia Mati, sa tatou pasia ai tulafono toe teuteu o le Fa’avae ma le Fa’amasinoga o Fanua ma Suafa. Sa lē i mafai ona faaauau le auiliiliga o le Tulafono toe teuteu o le Faavae e fa’asino i le 10% o Sui Faipule Tama’ita’i ma isi teuteuga o le tulafono o Faiga Palota faapea le Tulafono o le tuu eseese o le Matagaluega o Leoleo ma le Matagaluega o Falepuipui ma le Toe Fuataina, o lo’o iai pea i luga o le tatou laulau a fono. Na felautoa’i foi lau Afioga i le Fofoga Fetalai ma sui o le Kapeneta i le mataupu o le lē faatuatuaina o lau faatautaiga o le Palemene.
Lau Afioga i le Fofoga Fetalai, ua ou maua sou finagalo fa’aalia i au tusi, ina ia tatou taumafai e galulue faatasi e faaauau le galuega a le Palemene i le agaga o le fefa’amagaloa’i ma le feoeoea’i. Ailoga i se ā o le a tali tualimaina ai se nā faa-tofalaiga matagofie. Aua o le agaga o a’u nei ma le Kapeneta e tapena lava mataupu e faasolo mai i le Palemene aua le auaunaga faa-le-Malo na tofia mai i ai tatou uma o sui o le atunu’u.
Ae peita’i lau afioga i le Fofoga Fetalai ma le Palemene, talu mai le tatou fono talu ai, e lē natia pe pogisa foi le fa’afofoga ma le silasila a le atunu’u i nisi o faaaliga a le Taitai o le Itu Agai faapea foi le Sui o le Itumalo o Gagaifomauga #3 po’o le Taitaifono o le vaega fa’aupufai a le FAST, i le tatau ona fa’ata’ape le Palemene ma toe saili se finagalo o le atunu’u e ala i se faiga palota tele fa’afuasei.
Lau Afioga i le Fetalai ma le Palemene, ua faalua ona tatou asā lafo o le lē faatuatuaina i le tatou fono talu ai. Faatū mai le lafo muamua e le Itu Agai, teena e le sui o Gagaifomauga #3 ma sui e 19. Tafea le lafo. Faatū le lafo lona lua e le sui o Gagaifomauga #3 ma lana vaega, teena e le Itu Agai – Tafea le lafo ma o lo’o fa’aauau mai ai pea le faiga Malo.
Na ou folasia lava i luma o le Palemene i le tatou fono o le amataga o le tausaga lenei, e faia lava e le Palemene le faaiuga o le faamuta po’o le faaauau o le faiga Malo lenei. Lau Afioga i le Fofoga Fetalai ma le mamalu o le Palemene, o lo’o tumau pea lena mau ia te a’u ma le Kapeneta. E fa’atino le finagalo o le Palemene i luga o le fuainumera fulisia e ala i se palota. E pau le auala e maua ai se fuainumera fulisia o le maota e faamuta ai le faiga Malo lenei, o le tu’u fa’atasi o le Itu Agai e 18 ma le vaega e 20 o lo’o taitai e le sui o Gagaifomauga #3.
Ona ou o’o mai loa lea i le mataupu tupito o le Fonotaga lenei, le Tala Faatatau o le Tupe 2025/2026. Lau Afioga i le Fofoga Fetalai ma le Palemene, o le fa’agasologa o se Tulafono Tau Fa’aofi mo se Tala Faatatau o le Tupe mo se Tausaga Faa-le-Tupe, o se mataupu o le FA’ATUATUAINA O LE FAIGA MALO. E ui e lē o maioio i le Tulafono Faavae le tulaga lea, ae o se faiga masani lea (convention) i Malo fa’a-temokarasi, a paū se tala o le tupe, o se fa’ailo foi lea o le lē faatuatuaina o se faiga Malo.
Ma o lea, ou te fa’asilasila i le Palemene, a pasia le Tala o le Tupe 2025/2026 e faaauau le faiga Malo lenei. A lē pasia pe tafea le tulafono o le Tala Faatatau o le Tupe, ona tatou faagasolo loa lea i aiaiga o le Tulafono Faavae i le faata’ape o le Palemene.
O le tulaga masani o faiga palota i le maea lelei o se paeaiga, e 3 masina e faagasolo ai tapenaga mo le faiga palota e aofia ai ma le aso e faata’ape ai le Palemene. Afai, o le a paū le Tala o le Tupe, e iai ni to’a ogaoga e lua e ono lē mafai ai ona fai se tapenaga mo se palota tele i totonu o le 3 masina.
(1) Muamua, e le o po se lilo o lo’o faagasolo le faafouina o lesitala o lola palota. Ua logo mai e le Ofisa o Faiga Palota ua ausia le 52% o lesitala i le tulaga aoao ae olo’o iai Itumalo e lē o ausia le 50% o latou lola. O lo’o iai foi nisi o Itumalo, e lē o ausia le 30% e aofia ai Itumalo tetele i le Vaimauga ma Faleata.
(2) O le lona lua o to’a o le aiaiga i le Tulafono a Faiga Palota 2019, i le tatau ona lesitala sui tauva o le faiga palota i le 6 masina i luma mai o se faiga palota. E feteena’i lena aiaiga ma le Tulafono Faavae o lo’o aiaia ai e 3 masina e tapena ai se faiga palota tele.
Lau afioga i le Fofoga Fetalai ma le mamalu o le Palemene, e faigata ona faagasolo tapenaga masani mo se faiga palota i luga o le tulafono o lo’o iai nei, ma e moomia ai le tuuina atu o mataupu o le faiga palota mo ni faatonuga fa’ale-tulafono mai le Fa’amasinoga Maualuga.
O le isi vala taua o le paū o le Tala o le Tupe, pe faapefea ona faatupe auaunaga a le Malo mo le tausaga faaletupe fou. O aiaiga o le Faavae o lo’o iai, e fa’atulaga le 25% o le Tala o le Tupe o le tausaga o lo’o faagasolo nei e faaauau ai galuega a le Malo. Ae peitai, i le to’a lea ua iai i le mafai po’o le lē mafai ona tapena se faiga palota i totonu o le 3 masina ma manaomia ai se isi taimi faaopoopo, e ono lē lava le 25% o le Tala o le Tupe e fa’aauau ai galuega po’o auaunaga a le Malo ae le’i pale mai se faiga Malo fou i le mae’a ai o se palota tele.
Lau Afioga i le Fofoga Fetalai e ui i sou finagalo ma se matou foi agaga e faaauau le tatou galuega, ae tatou faagasolo ia i ala o mea ma tulaga manino, le galuega a le Palemene – poo fea o le a taoto iai se faatofalaiga a sui mamalu o le Fono Faitulafono.
Lau afioga i le fofoga fetalai ma le mamalu o le Palemene ma le tapuaiga a le atunuu, ua tapena mai e le Malo le tatou Tala Faatatau o le Tupe mo le 2025/2026, a ua faapena foi ona tapena pe a faapea o le a tatou faataape.
Ia manuia le Fono Usu a Samoa.
Soifua.
Ata Pueina – Parliament of Samoa
