Itula e tatala ai Supamaketi
OFISA O LE SO’OUPU; Ua toe teuteuina le Poloaiga ole KOVITI 19 lea ua faamautu ai itula e tatalaina Supamaketi e pei ona faatulafonoina ma amata faamamaluina ile Aso 21 Iuni 2020.
O lo’o tumau pea tapu ole Poloaiga e pei ona faamalosia muamua se ia vagana ai itula e tatala ai Supamaketi e pei ona taua I lalo.
(1) Mo Supamaketi:
(a) mai le Aso Gafua i le Aso Toonai e tatala i le 6:00 i le taeao – 7:00 i le afiafi; ma
(e) mo le Aso Sā, e tatala i le 3:00 i le aoauli – 7:00 i le afiafi; ma
(i) mo faleoloa laiti, e faaauau fefa’atauaiga i taimi masani.
(2) E tapu ona tatala soo se pisinisi i le Aso Sā vagana:
(a) faleoloa laiti, e fa’aauau fefa’atauaiga i taimi masani; ma
(e) Supamaketi i taimi faatapula’a ua taua i luga i le (2)(e).
(3) Mo le faatinoina o lenei poloaiga:
(a) o le “Supamaketi” e faatatau i fale oloa e faaaoga faitotoa e ulufale atu ai le tagata e fa’atau ai oloa (groceries ma isi);
(e) “faleoloa laiti” o faleoloa e le o iai ni faitotoa mo le ulufale o tagata ae tu le tagata faatau i fafo o le faamalama ma fai lana faatau.
O lenei Poloaiga e amata faamamaluina i le Aso 21 Iuni 2020.
Sainia i le Aso 20 o Iuni 2020.
Tuimaleali’ifano Va’aletoa Sualauvi II
AO O LE MALO
