(10 Oketopa 2023)
Lau Afioga i le Kovana ma lau Masiofo
Lau Afioga i le Peresitene o le Senate ma lou Faletua
Lau Afioga i le Fofoga Fetalai o le Maota o Sui
Afioga i le Failautusi o Mataupu Tau Samoa
Fa’apea foi lenei itu o le vai,
Tafatolu o le faigamalo,
Lau Afioga i le Sui Palemia,
Afioga i Minisita o le Kapeneta
Lau Afioga i le Fofoga Fetalai ma le mamalu o le Maota,
Tainane Sui Mamalu o le Fa’amasinoga.
Ua tatou fa’atasi foi ma Fa’atonu Sili ma Fa’auluuluga o Matagaluega eseese,
Aemaise le mamalu o le Faigamalaga a Amerika Samoa,
Ma Samoa ua potopoto.
E talitonu o lea ua mãtü i ãfaga, faiva sa fa’ae’e i le tai, ae fa’aifo i malae le ãsaga na tü talaloa i lavasiga ma nafa o lenei aso. Ua tofatuimoana ma galoma i le alititai o Fili ma Puletuu aveave o le lã. A’o lele ua fotua’i li’o o le masina, ma matagimalie e fogãnu’u, e talitalia le tauafiafi. Ua tu maualuga le alofa taumulimuli o le Silisili Ese, i so outou soifua ma so matou ola, ua lë tau le launiu ma fatitü, ae afea le tolotolo o le alofa, ma tali malie le filiga na ta’i i le Tuamasaga. Ua agalelei le Alii tatou te fesilafai i manü ma ofoofota’i i talaleomalie.
Ua paü foi ma malu tapuia le malae i Tiafau, i ona mamalu tauave. O lea ua tapisa Tumua ma Puleono, ua taoto i malae ti’a malie o le filiga, i le fa’amalo’ulo’u mai o le paia o le Faleagafulu ma le Motusã i ona upu fai o Malo, i Lau afioga i le Kovana Sili ma lau Kapeneta, Lau Afioga i le Peresitene o le Senate, Afioga i le Fofoga Fetalai, Afioga i le Failautusi o Mataupu Tau Samoa ma le loaloa o le faigamalaga ma uso mai Sasa’e. O mamalu fa’alupe i le Afifio o Sua ma le Vaifanu, Fofo ma Atiulagi, Ituau ma le Alataua, Saole ma le Launiu Saelua. Afio le Laaunaamotasi, Afifio o Fa’atui ma le Auva’a o To’oto’o. I le agaga fiafia, fa’atasi ai ma le Kapeneta ma Taitai uma o le Malo Tutoatasi o Samoa ou te fa’afeiloa’i atu ai i lo outou paia ma le mamalu. Afifio mai ma pouliuligia maia.
O loo talimau atu le tapuaiga a Tama ma o latou Aiga, Aiga ma latou Tama, Le usoga a Tumua ma Pule, Ituau ma le Alataua, Aiga i le Tai ma le Vaa o Fonoti.
O le mau tu’ufa’asolo, e talatala e le sousou o le sami, ni afã ma matagi o foufou mai. E fa’ailoa e le masina ma fetu le vaitau o figota ma le a’e o le i’a fa’atali a afioaga. O le totogo o laau, e tuaoi ai suiga o le tau. Ae e talatala e fesilafaiga fa’apenei, le vã lalata ma le mafana o so’otaga o Aiga. E afua mai i Malaetele seia paia le malae na tõ ai manü, o Samoa ma Amerika Samoa, o le Aiga.
E toe momoli le fa’amalo i le fa’atoatoa e pei o upu i le Alataua, i le fa’amoemoe sa lupe ma tino i le mãlama ua sola, i se finagalo ma le tofã saili o Lau Afioga i le Kovana ma le faigamalo, fa’apaiaina ou laufanua fa’avaomalo. O le a tautalaaso lenei taeao.
O le tatou feiloaiga lona 4 lenei talu ona toe amatalia le fonotaga fa’avaomalo o le Atoa o Samoa, ia Iulai o le tausaga na te’a nei. Se’i toe fili ‘afa ma timata alafua o le galulue fa’atasi mo le manuia o tatou tagata nu’u. E ui ina satia i tatou i le mau luitau, tatou te tapena pea ma tausoa le avega ia malu le faletele o Samoa e lua i ana upufai, faigamalo, atina’e ma le sailiga mo le manuia lautele. Ia toafilemu la tatou folauga ma mau i le fa’atuatua.
O le fetufaaiga o lenei afiafi ma a taeao o le a matimati ai talanoaga anoa ma ni vaega fa’aauau o a tatou taumafaiga ua taoto talu mai feiloaiga tomua. O se avanoa e fa’amasani atili ai auva’a ma totino eseese o matagaluega ona e muliga ni tusitusiga i le taua o so’otaga fa’aletagata ma le tomai fetufaa’i e fausia atu i mafutaga fa’apenei. Ia tali foi se vai mãlü a’o se fa’asiliga malosi i le aumalaga, ona o lea sa fa’ataumamate mai i le ala ma tiute o lenei aso.
O se taimi toe sauna e folau le Sã o lau Afioga i le Peresitene o le Senate ma le Faletua, o lau Afioga i le Fofoga Fetalai, o le tatalo ia fa’amanuia le Atua ma fa’aaloalo ala uma. A tu’u ama le fua ma taape le filialii i lenei afiafi, ia agalelei le Atua i faiga malologa, tatou feiloai i se taeao fou ua saunia e le Silisili Ese.
TOAST
Ou te valaaulia lo outou mamalu i se fa’amanuia mo lenei afiafi, ia tauaaoina a outou ipu taumafa, e fa’amanatu ai le faigamalaga a lau Afioga i le Kovana Sili, Peresitene o le Senate, Fofoga Fetalai ma le faigamalo o Amerika Samoa, ia fa’amanuia le Atua, IA MANUIA.
