Lau Susuga i le Taitai o le Sauniga – Rev. Siaosi Salesulu
Afifio Minisita o le Kapeneta & Minisita Lagolago
Afioga i le Faamasino Sili, ma le Mamalu o le Faamasinoga
Peresetene ma le Faalapotopotoga o Pisinisi Tumaoti i Samoa
Susuga i le mamalu o Faauluuluga o Matagaluega Eseese a le Malo
Sui Mamalu o le Pulega o Ava Malosi
Le mamalu o le auvala’aulia
O lea ua mae’a ona paepae paia ma mamalu o le asō. Ua manino foi ‘au o fala o lenei aso i le aofaga potopoto mai o le malo, ma lo outou afifio mai. Ua mae’a ona momoli lapalapa o mālo i lo tatou va tapuia ma le Tapa’au Sili i le Lagi, sa fitaituga iai le Susuga i le Fa’afeagaiga. Fa’afetai tele i lau susuga i le fa’afeagaiga mo le faamalosia’u, ao se fagufagu mo le mamalu ua afifio nei.
O paia ma mamalu ua malu taue’e ai le afifio o Samoa ua potopoto, ma ua poto ai moli i Futiafu e tasi i lenei aso, o le va’a lava e faaufi gatā, ae o le i’a fo’i mai moana ua uma ona ‘aīsa. Tulou, Tulou, Tulouna lava
O upu a le atunu’u, E tele lava aso ae le lau aso, E tele foi taeao ae le lau taeao. E talitonu le taofi, o le asō ma lona fa’amoemoe e le o se aso na fa’afuaveta, a o le aso sa fau ao ma fau po aua e le’o se galuega na faia ananafi, a’o se tapenaga ua tele aso ma masina o fa’atino ai. E ia te au la le agaga fa’agae’etia e fa’ailoa aloa’ia ai le galuega sa fitāituga i ai le Pulega o Ava Malosi, o le tusia lea o le Ta’iala mo le Puleaina o Ava Malosi i Samoa.
Ua mae’a tau fa’ailo le ‘auga o lenei aso e ala i le tusi vala’au sa tu’uina atu mai la tatou Pulega Fa’atonu. E talitonu lenei taeao, o se taeao ua saunia e le Atua sei o tatou umufono talatala i lenei galuega ua tino mai, ma ua tatalaina alo’aia i lenei taeao. Ina ua tula’i mai le Faigamalō ma ou se’ei i le tofiga o le Ta’ita’ifono o le Pulega Fa’atonu, e tele lava ni lu’itau sa feagai ai ma le Pulega Fa’atonu iana fa’ai’uga e patino i le puleaina lelei o ava malosi. O se tasi o lu’itau tele, o le leai lea o se ta’iala e lima ta’ita’iina ai galuega a le Pulega Fa’atonu e fa’atino ai ona tiute e pei ona i ai i le Tulafono Autu o Ava Malosi. E le gata i lea, o le maitau a le Pulega i le tele o fa’alavelave i totonu o nu’u ma afioga, o totonu o aiga ma totonu o le atunu’u, e mafua mai ona o oloa tau ava malosi.
O le mafua’aga lea na amatalia ai loa le iloiloga a le Pulega Fa’atonu ma tusia ai se Ta’iala, ina ia mafai ona manino le fa’atinoga o vaega o le tulafono autu, ma ia manino fo’i i latou uma e umia laisene, aemaise lava i fale gaosi ava malosi, i aiaiga uma o laisene, atoa ai ma vaega uma e tatau ona ausia mo le saogalemu ma le soifua maloloina o le atunu’u i oloa tau ava malosi.
O le auga a le fa’amoemoe o lenei ta’iala, ina ia faigofie ma manino aiaiga ma ala fua mo pisinisi uma e talosaga atu mo laisene o ava malosi. Ua fa’amanino ai pepa mo’omia mo talosaga, o ituaiga laisene e mafai ona umia e pisinisi, atoa ai ma aiaga e patino i ituaiga laisene ta’itasi.
O se tasi vaega taua o lenei taiala, ua aiaina ai le fa’ava’a mo oloa tau ava malosi e gaosi i totonu o le atunu’u. E aofia i lenei fa’ava’a le fuataga o le malosi o ava malosi e gaosiaina, o le fuataga mo fale gaosi ina ia o gatasi ma aiaiga a le Matagaluega o Soifua Maloloina. O nei tapenaga uma, o le a fesoasoani tele lea i le faamae’a ai lea o galuega a le Pulega Fa’atonu i ana tulafono fa’atonutonu ma unaia ai le puleaina lelei o ava malosi i le atunu’u.
O le vaaiga taulai a le Malo, o le unaia lea o le soifua lelei, saogalemu ma le sa’oloto o tagatanuu uma o Samoa. O le fa’amuamua foi lea a le Pulega Fa’atonu e tauala i lenei galuega. E le o toe po le silafia i a’afiaga o le soifua maloloina o tagata i lenei oloa aemaise lava i fa’amai le pipisi, ua iai foi ripoti i le a’afiaga i le nofo lelei o le atunu’u ma fa’alavelave tau ta’avale e afua mai ona o ava malosi. O le tali lea a le Malo e tauala i le galuega a le Pulega Fa’atonu o Ava Malosi, ina ia galulue fa’atasi ma pisinisi ma isi Matagaluega ma Ofisa o le Malo e fai se sao mo le va’aiga tauala’i mo le soifua lelei, maloloina ma le saogalemu o o tatou tagata.
Ia alofagia e le Atua lenei aofia ma lenei fa’amoemoe. Ia avea lenei ta’iala ma lomiga taua e unaia ai le silasila mamao a le Malo, atoa ai ma le Pulega Fa’atonu o Ava Malosi i lo tatou atunu’u. Agalelei le Atua i lau Susuga i le Ta’ita’i o le Sauniga, le tafatolu fa’atauagai o le Malo Tuto’atasi o Samoa, fa’apea foi malo ma Samoa ua potopoto.
Soifua ma ia manuia!
Ata Pu’eina – Malo o Samoa (Leaosa Faaifo Faaifo)
